Arrestohet pronari i Alta Bankës, Davor Macura: dyshohet se nxori nga kasaforta rreth 45 miliardë dinarë

Pronari i Alta Bankës, Davor Macura, u arrestua të hënën në Beograd, bashkë me dy punonjës të bankës, njoftoi Prokuroria Publike për Krimin e Organizuar (TOK), siç raporton Newsmax Balkans. Sipas prokurorisë, Macura dyshohet se ka nxjerrë para nga kasaforta e bankës dhe ka përfituar në mënyrë të paligjshme rreth 45 miliardë dinarë, afro 383 milionë euro.

Me urdhër të TOK-ut, në bashkëpunim me Drejtorinë e Policisë Kriminale, Shërbimin për Luftën kundër Krimit të Organizuar dhe Departamentin për shtypjen e krimit financiar të organizuar, u arrestuan edhe drejtori i Departamentit të thesarit dhe administrimit të parave të gatshme, G. M., dhe bashkëpunëtori për punët e thesarit, I. P.

Sipas njoftimit të prokurorisë që e citon Newsmax Balkans, dy punonjësit, të ngarkuar me trajtimin e drejtpërdrejtë të vlerave në kasafortë, dyshohet se i dorëzonin Macurës kartat e hyrjes ose ia mundësonin hyrjet e paautorizuara në kasafortën “Depo” me kartat dhe praninë e tyre, ndërsa ai gjatë këtyre hyrjeve nxirrte paratë jashtë. Macura ngarkohet me veprën penale të shpërdorimit të detyrës së personit përgjegjës, ndërsa dy të tjerët dyshohen se e kanë ndihmuar.

Më 31 tetor dhe 1 nëntor, me urdhër të prokurorisë, u kontrolluan ambientet e Alta Bankës dhe banesa që përdor Macura, ndërsa gjatë kontrollit në bankë u bë edhe inventari i parave të gatshme në kasafortë. Të tre të dyshuarve u është caktuar ndalimi deri në 48 orë dhe ata do të merren në pyetje në Prokurorinë për Krimin e Organizuar; zyra avokatore që mbron Macurën i kishte konfirmuar më herët Newsmax Balkans ndalimin e tij.

Arrestimi vjen vetëm dy ditë pasi Banka Kombëtare e Serbisë i hoqi licencën Alta Bankës për shkak të përkeqësimit të ndjeshëm të gjendjes financiare dhe nisi procedurën e falimentimit ndaj saj, zhvillim për të cilin 24-ore.com ka raportuar më herët. Prokuroria njoftoi se do ta informojë publikun me kohë për masat dhe veprimet e mëtejshme në këtë çështje.