“Asnjë manipulim”; prokuroria e Milanos kërkon pushimin e çështjes për Rocchi dhe Interin

Prokuroria e Milanos ka kërkuar pushimin e çështjes ndaj Gianluca Rocchi, ish-përgjegjësit të arbitrave, dhe Interit, të hetuar për dyshime mbi caktimin e arbitrave në 4 ndeshje, mes tyre edhe Torino-Inter të sezonit të fundit.

Sipas Prokurorisë, megjithëse u konstatua ekzistenca e episodeve të ndërhyrjeve të dyshuara, “nuk rezulton një sistem i strukturuar për të ndikuar në emërimet e arbitrave”. Në deklaratën e prokurorit Marcello Viola theksohet se çështja dallon mes mashtrimit sportiv me pasoja penale dhe “ndërhyrjeve që objektivisht nuk kanë karakteristikat për të cenuar rregullsinë e një ndeshjeje”.

Po ashtu u bë e ditur se edhe Interi ishte nën hetim sipas ligjit italian 231/2001 për përgjegjësinë administrative të subjekteve juridike. Hetuesit dyshonin se Rocchi kishte orientuar caktimet e arbitrave “në bashkëpunim me përfaqësues të paidentifikuar të Interit”, por kjo hipotezë tashmë është rrëzuar.

Pas dy vitesh hetime, prokurorët kanë përfunduar se nuk pati asnjë manipulim, megjithatë aktet i janë dërguar drejtësisë sportive dhe Prokurorisë së Përgjithshme të CONI-t për të vlerësuar shkelje të mundshme sportive.