Ausilio i jep lamtumirën Interit pas 28 vitesh, nuk ka akord mes palëve për rinovimin

Drejtori sportiv dhe klubi zikaltër nuk kanë gjeur gjuhën e përbashkët për zgjatjen e kontratës. Në fund të vitit ulet sipari i një historie dashurie gati 30-vjeçare.

Fundi i një ere. Pas 28 vitesh bashkë, Interi dhe Piero Ausilio duket se do të ndahen. Për t’i dhënë fund historisë së gjatë të dashurisë mes drejtuesit dhe Interit ka ndikuar kontrata që skadon në qershor të 2027-ës. Ausilio-s i është propozuar një rinovim njëvjeçar me të njëjtat shifra që ka kontrata aktuale, por ai nuk është bindur edhe është gati të largohet në fund të vitit.

Një jetë tek Interi, nga sekretar i sektorit të rinjve, deri te roli i drejtorit sportiv të skuadrës së parë. Ausilio e ka ngjitur piramidën zikaltër, duke folur gjithmonë me punën e tij. I rritur nën hijen e Marco Branca-s, Ausilio u bë drejtor sportiv i Interit në 2014-ën. Nga ai moment ka fituar 3 tituj kampion, 3 Kupa Italie dhe 3 Superkupa. Skuadra aktuale, prej vitesh më e mira në Serie A, mban firmën e tij.