Avokati Begoviq përgënjeshtron kthimin e Maroviqit: ai ndodhet në Beograd

Avokati Zdravko Begoviq përgënjeshtroi për gazetën Pobjeda informacionin që u shfaq në rrjetin social X, se klienti i tij shumëvjeçar, ish-funksionari i lartë i DPS-së Svetozar Maroviq, është kthyer në Mal të Zi. Në atë rrjet u publikua fotografia e një burri me kapelë, për të cilin pretendohet se është Maroviqi, me mbishkrimin “Svetozar Maroviq mbërriti në Podgoricë”.

“Kam biseduar me Maroviqin. Ai ndodhet në Beograd”, tha Begoviq për Pobjeda, duke përgënjeshtruar pretendimet për kthimin e tij.

Siç njofton Pobjeda, vendimi i Gjykatës Themelore në Kotorr për parashkrimin absolut të ekzekutimit të dënimit të tij me burg prej tre vjetësh e nëntë muajsh është bërë i formës së prerë. Prokuroria Themelore e Shtetit në Kotorr i konfirmoi gazetës se nuk është ankuar ndaj vendimit të 10 tetorit, sepse kanë skaduar afatet ligjore për ekzekutimin e dënimit.

Begoviq shpjegoi për Pobjeda se, pas formës së prerë të vendimit, mbetet që Gjykata Themelore në Kotorr të nisë procedurën e tërheqjes së urdhërarrestit ndërkombëtar të lëshuar për Maroviqin në maj 2017. Sipas tij, pikërisht ai urdhërarrest ishte pengesa për udhëtimin e lirë të Maroviqit jashtë Serbisë, sepse ekzistonte mundësia të arrestohej gjatë kalimit të kufirit.

Maroviqi e la Malin e Zi më 25 tetor 2016, përmes pikës kufitare Dobrakovo, dhe dënimin me burg, për të cilin ishte dënuar me vendim të formës së prerë, nuk e filloi kurrë ta vuajë.