Barr: SHBA duhet të përgatitet për ndërprerje serioze në tregun e punës nga inteligjenca artificiale

Në fjalimin e përgatitur për t’u mbajtur në Universitetin Yale, Barr tha se Shtetet e Bashkuara duhet të jenë të gatshme për këto tronditje, edhe pse ai nuk po parashikonte se ato do të ndodhin me siguri, por po sugjeronte përgatitjen për tensionet shoqërore që mund të sjellin, siç njofton Reuters. Komentet e tij vijnë pas zgjedhjeve të ndërmjetme, të cilat u ndikuan pjesërisht nga reagimi ndaj zgjerimit të shpejtë të inteligjencës artificiale, dhe i paraprijnë një forumi publik të Rezervës Federale në San Francisko të hënën, të organizuar nga një grup pune i emëruar nga kryetari i Fed-it, Kevin Warsh.

Pasojat mbeten të pasigurta, theksoi Barr, dhe varen nga konkurrenca e vazhdueshme mes kompanive të inteligjencës artificiale, si dhe nga pyetja nëse kjo teknologji do të bëhet një mall i lirë dhe i përhapur kudo, me përfitime të shpërndara gjerësisht, njësoj si interneti.

Alternativa, sipas tij, është përqendrimi në rritje i tregut te pronarët dhe investitorët e një grushti kompanish fituese, ku fitimet përqendrohen dhe u shkojnë pronarëve të kapitalit që zëvendëson punën, duke vazhduar rënien e pjesës së punës në të ardhurat kombëtare. Kjo pjesë ra në nivelin rekord të ulët prej 52,8 për qind në tremujorin e dytë të vitit 2026, pasi kishte qëndruar pak a shumë e qëndrueshme mes 60 dhe 65 për qind nga Lufta e Dytë Botërore deri në fillim të këtij shekulli.

Deri më tani, zhvendosja e punëtorëve ka qenë relativisht e vogël, madje ka edhe shenja se inteligjenca artificiale po nxit kërkesën dhe po shton vende pune. Çështja mbetet e pazgjidhur dhe varet, ndër të tjera, nga fakti nëse bizneset e vogla do të mund të ruajnë qasjen në këtë teknologji për t’u zgjeruar; inteligjenca artificiale mund t’u japë atyre qasje më të gjerë në aftësi dhe informacion.

“Askush nuk e di se në çfarë mase do të ndahen përfitimet”, tha Barr, duke vënë në dukje shenja se inteligjenca artificiale mund të jetë një zëvendësuese e punës në disa sektorë, sidomos për punëtorët më të rinj dhe më pak me përvojë. Nëse ndryshimet në tregun e punës ndodhin shpejt, do të jetë e vështirë që punëtorët të përshtaten dhe çrregullimet mund të jenë të mëdha, ndërsa përqendrimi i fuqisë së tregut mund të ndihmojë në thellimin e pabarazisë, e cila do të vinte në provë ëndrrën amerikane.