Bashkëthemeluesi i Anthropic: inteligjenca artificiale mund ta çojë ekonominë amerikane në 44 trilionë dollarë deri në 2030

Përmirësimi i shpejtë i aftësive të inteligjencës artificiale do të sjellë ndryshime shumë më të shpejta në të gjitha fushat, deklaroi të shtunën bashkëthemeluesi i Anthropic, Jack Clark, siç njofton Reuters. Sipas një modeli të brendshëm ekonomik të kompanisë, prodhimi ekonomik i Shteteve të Bashkuara mund të zgjerohet ndjeshëm dhe të arrijë në 44 trilionë dollarë deri në vitin 2030.

Clark foli gjatë takimeve vjetore të Fondit Monetar Ndërkombëtar dhe Bankës Botërore në Bangkok, ku, sipas raportimit të Reuters, bëri thirrje për bashkëpunim ndërkombëtar për të ngritur “rregulla të pazakonta dhe serioze” për këtë teknologji transformuese.

Shifra prej 44 trilionë dollarësh krahasohet me nivelin aktual të ekonomisë amerikane, pak mbi 30 trilionë dollarë. Clark pranoi se numri “duket shumë i pabesueshëm”, por theksoi se inteligjenca artificiale po e rrit ndjeshëm zbulimin shkencor. “E di, por kjo nënkuptohet nga fakti që teknologjia vazhdon të përmirësohet. Dhe nëse PBB-ja do të rritej kaq shumë, atëherë doktrina ekonomike sugjeron se do të duheshin krijuar industri dhe shpikje të reja për ta fuqizuar një zgjerim kaq të madh ekonomik”, tha ai, siç njofton Reuters.

Deklaratat e Clark vijnë në kulmin e debatit në takimet e Bangkokut mbi mënyrën se si qeveritë dhe kompanitë duhet ta rregullojnë inteligjencën artificiale. Sipas Reuters, drejtoresha e FMN-së, Kristalina Georgieva, paralajmëroi një ditë më parë se rreziqet e inteligjencës artificiale mund t’i tejkalojnë mundësitë nëse nuk ndërtohen mbrojtje dhe një kuadër etik i përshtatshëm, duke mbështetur një kombinim të vetërregullimit të industrisë dhe rolit të qeverive kyçe.