Bastiset selia e Federatës Spanjolle të Futbollit, arrestohet i besuari i ish-presidentit Rubiales

Njësia Qendrore Operative e “Guardia Civil” bastisi selinë e Federatës Spanjolle të Futbollit në Las Rozas, një zonë periferi të Madridit. Sipas informacioneve nga shtypi iberik, ka një hetim për kontratat e supozuara të parregullta në pesë vitet e fundit; thuhet se ka shtatë të arrestuar dhe mes tyre është Tomás González Cueto, këshilltar i jashtëm ligjor i Federatës spanjolle të futbollit dhe një nga njerëzit e besuar të ish-presidentit Luis Rubiales.

Operacioni drejtohet nga Gjykata numër 4 e Majadahonda (Madrid), në koordinim me Prokurorinë kundër korrupsionit dhe krimit të organizuar. Oficerët thuhet se po hetojnë krimet e dyshuara në lidhje me korrupsionin, keqadministrimin dhe pastrimin e parave. U kryen edhe disa kontrolle në shtëpi private, përfshirë atë të Rubiales, i cili aktualisht ndodhet në Republikën Domenikane.

Hetimi duket se po hedh dritë mbi kontratën e transferimit të Superkupës së Spanjës drejt Arabisë Saudite, të nënshkruar nga presidenti i atëhershëm Luis Rubiales dhe sipërmarrësi dhe ish-futbollisti Gerard Pique. Akuza është korrupsion dhe konflikt interesi.