BE bie dakord për krijimin e një misioni të ri civil dhe ushtarak në Liban

Ministrat e Jashtëm të Bashkimit Evropian ranë dakord të hënën për krijimin e një misioni të ri civil dhe ushtarak në Liban, me synimin për të forcuar forcat e sigurisë së vendit, ndërsa Kombet e Bashkuara përgatiten t’i japin fund misionit të tyre shumëvjeçar paqeruajtës.

Misioni i ri mund të nisë funksionimin brenda disa muajsh dhe do të përqendrohet te siguria kufitare dhe detare, lufta kundër dronëve dhe trajnimi i forcave libaneze të sigurisë. Detajet përfundimtare mbi mandatin, personelin dhe strukturën e komandës ende nuk janë përcaktuar.

Shefja e diplomacisë së BE-së, Kaja Kallas, deklaroi në Luksemburg se misioni do të ketë dy komponentë, civil dhe ushtarak, duke shtuar se autoritetet libaneze e kanë mirëpritur nismën.

Ndryshe nga Forca e Përkohshme e Kombeve të Bashkuara në Liban (UNIFIL), mandati i së cilës përfundon në fund të vitit 2026, misioni evropian nuk parashikohet të vendoset në jug të vendit, ku Izraeli po vijon operacionet ushtarake kundër Hezbollahut, grupit të mbështetur nga Irani.

Nisma vjen në një kohë pasigurie për sigurinë e Libanit, përpara përfundimit të misionit të OKB-së, i cili ka shërbyer si forcë paqeruajtëse përgjatë kufirit me Izraelin. Presidenti libanez, Joseph Aoun, ka kërkuar zgjatjen e mandatit të UNIFIL-it.