Begona Gomez drejt gjyqit, akuzat vendosin nën presion kryeministrin Pedro Sanchez

Begona Gomez, bashkëshortja e kryeministrit spanjoll Pedro Sanchez, do të përballet me proces gjyqësor lidhur me akuzat për shpërdorim ndikimi dhe përvetësim.

Sipas raportimeve nga mediat e huaja, hetimi lidhet me pretendimet se ajo ka përdorur marrëdhënien me kryeministrin për të avancuar aktivitetet e saj profesionale dhe për të bashkëdrejtuar një program në Universitetin Complutense të Madridit, si edhe me dyshime për përdorimin e fondeve publike dhe personelit qeveritar për përfitime private.

Gomez i mohon akuzat, ndërsa prokuroria dhe mbrojtja e saj kanë kërkuar që çështja të pushohet, duke argumentuar se provat nuk dëshmojnë kryerjen e një vepre penale. Tashmë çështja pritet t’i kalojë një gjykate më të lartë, e cila do të përcaktojë datën e seancës. Paralelisht, një grup që merr pjesë në proces si akuzues privat ka kërkuar një dënim prej 13 vitesh burg për Gomez.