Berisha: Akuzat e Doshit, më të rëndat e 25 viteve të fundit

Në komentin e tij për çështjen “Doshi”, ish-kryeministri, Sali Berisha e ka cilësuar akuzën e deputetit të përjashtuar nga Partia Socialiste më të rëndën e 25 viteve të fundit.

“Akuzat se Ilir Meta dhe Edi Rama planifikuan vrasjen e dy deputetëve të parlamentit shqiptar, janë akuzat më të rënda publike në tërë historinë e pluralizmit shqiptar. Deputeti Doshi pohon se kryetari i parlamentit të vendit, Ilir Meta, në marrëveshje me Edi Ramen, ka paguar për vrasjen pra eliminimin fizik te tij dhe deputetit të PD-së, Mhill Fufi”, shprehet Berisha.

“Doshi njoftoi para medieve se për akuzën e tij, më e renda 25 vitet e fundit, disponon fakte të cilat ai i ka paraqitur brenda dhe jashtë vendit.”

Ish-kryeministri ka nënvizuar më tej se, ‘plani për vrasjen e deputetëve’ është “një ogur i zi për stabilitetin e vendit”.

Reagimi i Berishës si gjithnjë mbyllet me thirrjen e zakonshme. “Ju bej thirrje qytetarëve të vendit të ngrihemi fuqishëm për të shpëtuar vendin nga klika e vrasësve në krye të pushtetit!”