Të lënduarit në protesta, Rama akuzon nxitësit e dhunës: I riu që u plagos në sy duhet të jetë kambanë alarmi

Kryeministri Edi Rama ka reaguar për të lënduarit në protestat e dhunshme, duke akuzuar organizatorët dhe nxitësit e dhunës për përgjegjësi në përshkallëzimin e situatës.

Rama u shpreh se lëndimi i të riut në sy duhet të shërbejë si një këmbanë alarmi, ndërsa theksoi se është marrë personalisht me sigurimin e trajtimit të tij në një spital në Itali dhe transportit me avion charter mjekësor.

Rama deklaroi se pjesëmarrja në protesta të dhunshme paraqet rrezik edhe për vetë protestuesit, ndërsa akuzoi kundërshtarët politikë se po e përdorin plagosjen e të riut për të nxitur më tej tensionet.

Rama u shpreh se dhuna, djegiet dhe shkatërrimet nuk do të arrijnë qëllimin e atyre që, sipas tij, po i nxisin.

“Pjesëmarrja në protestat e dhunshme është sigurisht e rrezikshme edhe për vetë dhunuesit dhe ata që rrinë rrotull tyre, aq më tepër kur dihet tanimë edhe botërisht që në këto protesta është edhe dora e një matufi maniak me një biografi të pasur me zjarrvënie e me gjakderdhje.

Më vjen shumë keq kur kushdoqoftë lëndohet fizikisht, qoftë edhe një protestues i dhunshëm, por si mund të shmanget çdo lëndim i mundshëm nëse dhuna e dikton natyrën e një proteste?!

Kjo është një pyetje retorike dhe lëndimi i djalit nga Elbasani duhet të jetë një këmbanë alarmi për të gjithë, po mbi të gjitha për nxitësit e dhunës që propagandojnë nga ekranet e korruptuara televizive dhe nga pasqyrat e tyre sociale apo më zi akoma që paguajnë për mish për top lloj-lloj individësh, nga kriminelë, te djem të paditur e deri te fëmijë të mitur.

Pasi jam marrë personalisht që mbrëmë me sigurimin e kurimit të djalit në spitalin më të mirë të Italisë, si edhe të transportit me një avion charter mjekësor, u them të gjithë atyre që po e keqpërdorin si të tërbuar syrin e plagosur të tij për të nxitur më tej dhunën:

Ju jeni errësira që i mbylli atij djali dritën e syrit! Ju jeni gishtat dhe thonjtë e dorës së malkimit që e përndjek Shqipërinë qysh në 1912-ën, duke ia mbyllur sytë sa herë ky vend sheh dritë!

Po këtë herë jeni të humbur, sepse drita e Shqipërisë është sot ku e ku më e madhe se sa errësira dhe ju jeni gjithnjë e më pak, prandaj edhe po dhunoni, digjni e shkatërroni me urrejtjen e pangushëllueshme të asaj dore, por duke ua kujtuar më mirë se kurrë shqiptarëve se kush jeni.

Dhe shqiptarët s’do t’ua falin. Prisni dhe shikoni”, tha Rama

Ende nuk ka komente. Bëhuni i pari që komenton.