Berisha: Deklarata e Zelenskit në kundërshtim me të drejtën ndërkombëtare dhe jashtë çdo konteksti historik

Kreu i Partisë Demokratike, Sali Berisha, ka kritikuar deklaratën e presidentit ukrainas Volodymyr Zelensky në Beograd për pavarësinë e Kosovës, duke e cilësuar atë të papranueshme dhe në kundërshtim me të drejtën ndërkombëtare.

Duke komentuar qëndrimin e Zelenskyt, Berisha tha se deklarata e tij bie ndesh me vendimet e NATO-s, planin e Ahtisarit dhe qëndrimet e vendeve kryesore anëtare të Aleancës së Atlantikut të Veriut.

“Sot kemi një deklaratë në të cilën ne shprehim keqardhje për deklaratën e presidentit Zelenski në Beograd për pavarësinë e Kosovës, të cilin ai u shpreh se është e njëanshme. Kjo deklaratë e presidentit Zelenski vjen në kundërshtim të hapur me vendimet e Aleancës së Atlantikut të Veriut, me planin e Ahtisarit të miratuar nga Organizata e Kombeve të Bashkuara.

Vjen në kundërshtim të hapur me vendimet e vendeve kryesore anëtare të Aleancës së Atlantikut të Veriut.

Vjen në kundërshtim të hapur me të drejtën dhe ligjin ndërkombëtar, të interpretuara ato me kërkesë të Beogradit nga Gjykata Ndërkombëtare e Organizatës së Kombeve të Bashkuara, e cila është shprehur për legjitimitetin e pavarësisë së Kosovës. Por nga ana tjetër, deklarata është dhe në një aspekt tjetër jashtë çdo konteksti historik”, tha Berisha.

Sipas tij, shqiptarët në Shqipëri dhe Kosovë kanë mbështetur luftën e Ukrainës dhe popullin ukrainas, ndërsa Serbia ka mbajtur për një kohë të gjatë marrëdhënie të afërta me Moskën.

Në këtë kontekst, Berisha tha se deklarata e Zelenskyt në Beograd është e papërshtatshme edhe në raport me interesat e vetë Ukrainës, duke e cilësuar atë si “krejtësisht pa vend” dhe “të papranueshme”.

“Shqiptarët janë një komb mik me kombin ukrainas dhe në Shqipëri dhe në Kosovë, ata janë solidarizuar plotësisht me luftën heroike të popullit të Ukrainës nën udhëheqjen e presidentit Zelensky kundër agresionit barbar rus.

Kurse Serbia gjer para pak kohëve ishte Kali i Trojës i Kremlinit në Ballkan. Është Rusia e vogël, e cila në mënyrë të pamohueshme shërbeu dhe vazhdon në një farë mënyre të shërbejë si prapavijë e fuqishme e Rusisë në Ballkan.

Edhe në këtë kuadër deklarata e presidentit Zelenski është jashtë çdo konteksti, dhe mendoj unë, interesi për vendin e tij. Ndaj dhe Partia Demokratike e cilëson atë një deklaratë krejtësisht pa vend, krejtësisht të papranueshme dhe do të thosha një deklaratë fatkeqe në një vend që s’duhej bërë kurrë dhe për pavarësinë e Kosovës”, deklaroi kreu i PD-së.