Berisha me ”plan B” për largimin e Ramës: Shkarkim me mocion mosbesimi në parlament

Kryedemokrati Sali Berisha ka menduar planin B për rrëzimin e kryeministrit Edi Rama nëse sipas shefit të qeverisë nuk pranon të dorëhiqet bazuar në kërkesën e opozitës si edhe të protestuesve.

Marrë shkak nga vendimi i Mariana Koçekut për të mos qenë më pjesë e grupit parlamentar socialist duke zgjedhur të jetë deputete e pavarur, Berisha ftoi edhe deputetë të tjerë socialistë të ndërmarrin të njëjtin akt për të përmbysur raportet parlamentare dhe për të çuar parlamentin në mocion për kryeministrin.

“I hap rrugën shkarkimit me mocion mosbesimi Edi Ramës dhe krijon në parlament një mundësi për plotësimin e të gjitha kërkesave. Opozita do t’i ketë të gjitha votat në favor të kërkesave kushtetuese të protestës rinore qytetare,” u shpreh Berisha.

Ai tha se kryeministri nuk ka legjitimitet dhe se çdo ditë sipas tij i ndodhin skandale, ku një prej tyre tha se e kishte mësuar nga qytetari dixhital. “Qytetarë dixhitalë më informojnë se Lubia ka bërë tre udhëtime me skf në Greqi duke shmangur kontrolle policore, dogana dhe çdo gjë të mbushur plot. E kuptoni ju vetë se me çfarë mund të jetë mbushur skapi?” deklaroi Berisha.

Këto deklarata kryedemokrati i bëri në konferencën ku akuzoi shefin e qeverisë se ka manipuluar raportet për pasqyrimin e opozitës në media.