Berisha: Pa fuqizimin e grave dhe vajzave nuk ka demokraci të vërtetë

Kryetari i Partisë Demokratike, Sali Berisha, gjatë konferencës “Fuqizimi i rolit të grave në demokracinë lokale”, të organizuar nga PD në bashkëpunim me fondacionin suedez “Jarl Hjalmarson”, e vuri theksin tek roli i grave dhe vajzave në shoqëri dhe politikë, duke e cilësuar atë si vendimtar për forcimin e demokracisë dhe zhvillimin e vendit.

Në fjalën e tij, Berisha falënderoi organizatorët dhe partnerët ndërkombëtarë për mbështetjen e vazhdueshme ndaj Partisë Demokratike, ndërsa u ndal veçanërisht tek kontributi i grave.

Ai u shpreh se “gjeneza e shpresës është gruaja” dhe i ftoi vajzat dhe gratë të bëhen “gjenerator shprese për PD-në”.

Berisha theksoi se Partia Demokratike e ka konsideruar gjithmonë jetike betejën kundër patriarkalitetit, duke e cilësuar atë si pengesën më të madhe për liritë dhe të drejtat e njeriut.

“Muri i patriarkalitetit është dhunuesi më i madh i lirive. Pa fuqizimin e grave dhe vajzave nuk ka demokraci të vërtetë”, tha ai, duke shtuar se PD ka ndërmarrë hapa konkretë për të ngushtuar pabarazitë, sidomos në aspektin ekonomik. Ai kujtoi se gjatë qeverisjes së PD-së diferenca në financat mes burrave dhe grave u ul nga 36% në rreth 17%, duke e afruar Shqipërinë me mesataren e Bashkimit Europian.

Lideri demokrat nënvizoi se PD do të ketë prioritet rritjen e përfaqësimit të grave në forumet drejtuese të partisë dhe në qeverisjen e ardhshme.

“Ne zotohemi për një rol shumë më të madh të vajzave dhe grave në organizimin dhe drejtimin e Partisë Demokratike dhe të qeverisjes së saj të ardhshme”, deklaroi Berisha, duke përshëndetur zonjat që kanë marrë përsipër drejtimin e degëve të PD-së në procesin e brendshëm zgjedhor.

Ai shtoi se përfaqësimi i grave nuk është thjesht një normë, por lidhet drejtpërdrejt me legjitimitetin e institucioneve politike.

“Problemi i përfaqësimit të grave dhe vajzave në politikë, në udhëheqjen e PD-së, në parlament dhe nesër në qeveri, ka të bëjë me vetë legjitimitetin e forumeve drejtuese dhe përfaqësuesve të popullit”, tha Berisha.

Berisha u shpreh i bindur se zgjerimi i hapësirës për gratë dhe vajzat në politikë është një nga rrugët më të sigurta për ripërtëritjen dhe gjallërimin e Partisë Demokratike, duke e lidhur fuqizimin e tyre me demokracinë e vërtetë dhe zhvillimin e vendit.