Berisha reagon ndaj deklaratës së Vuçiç për ndryshimin e rrjedhës së Ibrit: Kërcënim çnjerëzor, akt destabilizues për paqen në rajon

Kryetari i Partisë Demokratike, Sali Berisha, ka reaguar ndaj deklaratave të Presidentit serb, Aleksandër Vuçiç, për ndryshimin e mundshëm të rrjedhës së lumit Ibër.

Sipas liderit të demokratëve, deklaratat e Vuçiç përbëjnë një sinjal alarmi për Kosovën dhe të gjithë rajonin.

Berisha e cilëson deklaratën si një “kërcënim të hapur çnjerëzor me frymëzim mitologjik”, ndërsa akuzon Vuçiçin për një politikë të drejtuar nga urrejtja ndaj shqiptarëve.

“Do t’ju shterojë ujin! Ky është kërcënimi i fundit i padronit të Edi Ramës, Aleksandër Vuçiç ndaj Kosovës dhe qytetarëve të saj. Ky kërcënim i hapur çnjerëzor me frymëzim mitologjik dëshmon dhe një herë se Presidenti i Serbomadhisë Vuçiç me imagjinatën e tij të sëmurë është i aftë që në një urrejtje të pakufishme ndaj shqiptarëve të planifikojë përdorimin edhe të etjes si armë genocidale ndaj etnisë së tyre dhe vendit fqinj. Partia Demokratike dënon me forcë një kërcënim të tillë si akt destabilizues për paqen dhe stabilitetin në rajon”, shkruan Berisha.