Berisha rikthen akuzat ndaj Ramës: Përdor familjarët për të nxjerrë jashtë vendit para të paligjshme

Kryetari i Partisë Demokratike, Sali Berisha, deklaroi në një konferencë për mediat se eurodeputeti Tomáš Zdeçovski ka ngritur akuza ndaj kryeministrit Edi Rama për përdorimin e familjarëve të tij në transferimin jashtë vendit të parave të dyshuara si të paligjshme.

Berisha shtoi se Rama nuk ka reaguar ndaj këtyre pretendimeve dhe e akuzoi për përpjekje për të censuruar lajmin.

“Sot jam këtu për deklaratën e anëtarit të PE-së, i cili denoncoi dje në një nga mediat e Tiranës, Edi Ramën si njeriun që përdor familjarë te tij për të transportuar para jashtë shtetit. Kjo deklaratë thekson se; ne po ndjekim paratë, këtë veprimtari të Ramës me paratë e grabitura shqiptarëve, ose paratë e trafikantëve shqiptarë. Kjo deklaratë në PE është bërë vetëm për Gadafin, dhe jo për ndonjë lider të vendeve anëtare të lira. Deklarata e europarlamentarit është aktakuza më e rëndë që i bëhet personalisht Edi Ramës dhe familjarëve të tij nga një personalitet i shquar i BE”, tha Berisha.

Kreu i opozitës deklaroi se PD do të rikthejë kërkesën për një komision hetimor për vjedhjet e kreu të qeverisë.