BERLIN – Gjermania akuzon militantë të dyshuar të Hamasit për sigurimin e armëve

BERLIN, 11 shtator /ATSH-DPA/- Prokuroria Federale gjermane njoftoi sot se ka ngritur akuza ndaj shtatë personave të dyshuar si anëtarë të grupit palestinez Hamas, për sigurimin e armëve dhe municioneve për sulme ndaj objekteve izraelite ose hebraike në Gjermani dhe Austri.

Sipas prokurorëve, sulmet dyshohet se ishin planifikuar vitin e kaluar, në kuadër të përvjetorit të dytë të sulmeve terroriste të 7 tetorit 2023 në Izrael.

Objektivat e dyshuara përfshinin përfaqësues izraelitë, persona hebrenj dhe mbështetës të Izraelit.

Të dyshuarit akuzohen se, në rolin e operativëve të Hamasit jashtë territorit, kanë siguruar armë dhe municione për organizatën.

Një person tjetër po ndiqet penalisht në një proces të veçantë, pasi ndodhet ende në paraburgim në Britaninë e Madhe, në pritje të ekstradimit.

Prokuroria Federale akuzon shtatë të dyshuarit, të cilët kanë shtetësi të ndryshme, për anëtarësim në një organizatë terroriste të huaj, përgatitjen e një akti të rëndë dhune, që mund të rrezikonte sigurinë e shtetit, si dhe për shkelje të ligjeve për armët. /