Besimtarët myslimanë festojnë Kurban Bajramin, mijëra qytetarë mblidhen në bulevardin e “Dëshmorit e Kombit”

Besimtarët myslimanë në Shqipëri dhe në mbarë botën kremtojnë sot Kurban Bajramin, një prej festave më të rëndësishme të besimit islam. Në Tiranë, mijëra qytetarë u mblodhën që në orët e para të mëngjesit në bulevardin “Dëshmorët e Kombit”, ku u zhvillua ceremonia e faljes së namazit.

Mesazhi kryesor i kësaj dite ishte solidariteti, paqja dhe ndihma ndaj njerëzve në nevojë. Kreu i Komunitetit Mysliman të Shqipërisë, Bujar Spahiu, uroi besimtarët për festën, duke theksuar rëndësinë e mirësisë dhe bashkëjetesës.

Ai apeloi që kjo festë të shërbejë si moment reflektimi për më shumë dashuri, respekt dhe përkushtim ndaj familjes, shoqërisë dhe vendit. Spahiu theksoi gjithashtu se feja islame i fton besimtarët të qëndrojnë pranë atyre që kanë nevojë dhe të kontribuojnë për një shoqëri më të drejtë e më humane.

Në mesazhin e tij, kreu i KMSH-së shprehu urimin që paqja dhe mirëkuptimi të mbizotërojnë kudo në botë, veçanërisht në zonat e prekura nga konfliktet.

Kurban Bajrami lidhet me historinë e Profetit Ibrahim dhe devotshmërinë e tij ndaj Zotit. Sipas traditës islame, ai ishte i gatshëm të sakrifikonte të birin, Ismailin, si shenjë bindjeje ndaj urdhrit hyjnor, por në momentin e fundit Zoti e zëvendësoi atë me një dash për kurban.

Për besimtarët myslimanë, kjo festë simbolizon sakrificën, përkushtimin dhe besimin, ndërsa shoqërohet edhe me akte bamirësie dhe ndihmë për familjet në nevojë.