Bilanci i një viti, Peleshi: Kjo është legjislatura e integrimit evropian

Pavarësisht një legjislature shpesh me tensione me opozitën kryetari i Kuvendit Niko Peleshi i ka konsideruar seancat e kuvendit të suksesshme.

Në mbledhjen e zgjeruar të grupit socialist vëmendjen e drejtoi te Unioni. Madje ndër rastet e rralla për këtë proces edhe opozita ka dhënë dakordësinë.

“Janë miratuar pozicionet negocuese me Bashkimin Evropian, kemi monitorituar procesin e negociatave, kemi kryer dëgjesa me ministrat dhe grupet e punës dhe kemi miratuar me konsensus rezolutën për procesin e integrimit të Shqipërisë në BE”, tha Peleshi.

Në kuadër të integrimit, pas pushimeve verore në Tiranë pritet në mblidhen të gjithë liderët e Parlamenteve të vendeve anëtare, ku Shqipëria do të jetë organizatore e kësaj konference ndërparlamentare. “Në javët e para të sesionit të ri Kuvendi do të organizojë konferencën ndërparlamentare”, tha Peleshi.

Por dhe për deputetët në Shqipëri kërkohen kushte të reja ku Peleshi risolli në diskutim projektin për ndërtimin e një parlamenti të ri.