BRUKSEL – BE dëshiron të përjashtojë nga prokurimet publike kompanitë e huaja

– Bashkimi Evropiane dëshiron të përjashtojë nga prokurimet publike kompanitë e huaja që rrezikojnë sigurinë e sa, shkruan euronews com.

Shqetësimet kryesore lidhen me transferimin e të dhënave sensitive dhe varësinë strategjike nga teknologjitë dhe mineralet.

Komisioni Evropian synon të ashpërsojë rregullat për hyrjen në tregun e Bashkimit Evropian, duke u dhënë autoriteteve publike mundësinë të përjashtojnë nga tenderët kompanitë e huaja që paraqesin rrezik ndërhyrjeje ose ndikimi të papërshtatshëm.

Ky draft vjen në një kohë tensionesh të mëdha gjeopolitike.

Ekzistojnë shqetësime se të dhëna të ndjeshme nga shërbime publike mund të transferohen drejt Pekinit dhe Uashingtonit, si dhe frika se varësia e BE-së nga tokat e rralla dhe nga produktet teknologjike të importuara nga Kina mund të përdoret si mjet presioni politik dhe ekonomik.

Projektteksti parashikon që autoritetet kontraktuese, kur është e nevojshme dhe në çdo fazë të procedurës së prokurimit — nga planifikimi dhe konsultimi i tregut deri te dhënia dhe zbatimi i kontratës — të marrin masa të përshtatshme për të mbrojtur interesat e Bashkimit Evropian në fushën e sigurisë dhe të rendit publik.

Dokumenti thekson se rreziqet për sigurinë ose rendin publik mund të lindin nga kompani, struktura e pronësisë, kontrollit ose financimit e të cilave krijon rrezik për ndërhyrje të padrejtë ose ndikim të jashtëm.

Po ashtu, rrezik mund të përbëjnë edhe kompani që janë të ekspozuara ndaj legjislacionit të vendeve të treta, i cili mund t’i detyrojë ato të zbulojnë informacione të ndjeshme ose të ndërhyjnë në mënyrën se si zbatohet kontrata.

Së fundi, autoriteteve kontraktuese do t’u lejohej të vendosnin një preferencë evropiane në prokurimet publike, edhe pse propozimi nuk do ta bënte një detyrim të përgjithshëm për të gjitha tenderët.

Dispozita të tilla mund të konfirmojnë kthesën më proteksioniste të Bashkimit Evropian drejt një strategjie “Made in Europe”, të cilën Komisioni Evropian e ka promovuar tashmë që prej marsit për sektorë strategjikë si teknologjitë e pastra, industria automobilistike dhe industritë me konsum të lartë energjie.

Rreziqet që lidhen me ndërhyrjet e huaja dhe transferimin e të dhënave janë shtuar ndjeshëm vitet e fundit, pasi Shtetet e Bashkuara dhe Kina kanë miratuar ligje që u japin autoriteteve të tyre mundësinë të kërkojnë nga kompanitë nën juridiksionin e tyre transferimin e të dhënave që ruhen brenda territorit të Bashkimit Evropian.