BRUKSEL – BE propozon ligjin e ri për strehimin e përballueshëm në Evropë

BRUKSEL, 9 /ATSH-ANSA/ – Bashkimi Evropian do të vendosë një sërë kriteresh ku do të përcaktojë “zonat nën presion për strehim”, duke i fuqizuar autoritetet lokale për të futur kufizime në qiratë afatshkurtra, duke përfshirë ato për qëllime turistike.

Sipas propozimit, autoritetet do të duhet të verifikojnë nëse raporti midis çmimit mesatar të shitjes së banesave dhe të ardhurave të disponueshme për frymë është të paktën tetë vite të ardhura; nëse raporti mes çmimeve të banesave dhe të ardhurave është rritur gjatë dhjetë viteve të fundit; si dhe nëse, pa ndërhyrjen e parashikuar, situata nuk ka gjasa të përmirësohet gjatë tre viteve të ardhshme.

Kur ky raport kalon 10 vite, pragu konsiderohet mjaftueshëm i lartë dhe domethënës, ndaj nuk është e nevojshme të shqyrtohet edhe zhvillimi i tij gjatë dhjetë viteve të fundit.

“Affordable Housing Act”, ose Ligji për Strehimin e Përballueshëm, prezanton për herë të parë një kuadër të përbashkët evropian për vlerësimin e masave në fushën e strehimit që ndikojnë në tregun e vetëm evropian.

Vendimi nëse duhet të ndërhyhet dhe cilat masa duhet të merren do t’u mbetet autoriteteve kombëtare, rajonale dhe lokale.

Politikat e strehimit vazhdojnë të jenë në kompetencë të shteteve anëtare dhe të autoriteteve të tyre.