BRUKSEL – Dombrovskis: BE duhet të përcaktojë saktë nevojat buxhetore të Ukrainës

bRUKSEL, 11 /ATSH/ – Në një intervistë Komisioneri Valdis Dombrovskis ka deklaruar se duhet të sqarohen fillimisht “çështjet e hapura” lidhur me nevojat buxhetore të Ukrainës, shkruan euronews.com.

Kievi u ka kërkuar aleatëve të tij të mbulojnë një deficit financimi prej 23 miliardë eurosh.

”Bashkimi Evropian duhet të përcaktojë saktësisht përmasat e nevojave buxhetore në rritje të Ukrainës përpara se të vendosë se si ta mbulojë këtë mungesë fondesh, tha për Euronews Komisioneri për Ekonominë, Valdis Dombrovskis, i cili mbikëqyr mbështetjen për vendin e rraskapitur nga lufta.

“Sigurisht që duhet të bëjmë një vlerësim të duhur dhe të detajuar, por e kuptojmë se lufta vazhdon me intensitet të lartë. Përkundrazi, Rusia po i intensifikon sulmet e saj,” tha Dombrovskis në një intervistë.

“Rrjedhimisht, edhe situata ekonomike në Ukrainë është shumë e vështirë. Kështu që e kuptojmë se kjo mund të çojë në nevoja më të mëdha financimi për Ukrainën,” shtoi ai.

Muajin e kaluar, presidenti ukrainas Volodymyr Zelenskyy i gjeti aleatët të papërgatitur kur u kërkoi atyre të mbulonin një deficit prej 27 miliardë dollarësh (23 miliardë euro) në buxhetin e Ministrisë së Mbrojtjes.

Kievi argumenton se kjo mungesë fondesh vjen si pasojë e përdorimit të parakohshëm të fondeve të planifikuara për gjysmën e dytë të vitit, për të mbuluar shpenzimet e gjashtë muajve të parë.

Shuma prej 23 miliardë eurosh nevojitet për personelin, mbështetjen sociale dhe blerjen e armatimeve, përfshirë rreth 6 miliardë euro pagesa paraprake për dërgesa të planifikuara për në fillim të vitit 2027.

Megjithatë, Brukseli nuk është ende i bindur dhe kërkon një pasqyrë të detajuar për të kuptuar sa e madhe është mungesa e fondeve, nga vjen ajo dhe si mund të mbulohet. Në bisedimet teknike është përfshirë edhe Fondi Monetar Ndërkombëtar.

Si një zgjidhje e mundshme, Zelenskyy ka propozuar që BE-ja të përshpejtojë disbursimet në kuadër të paketës së saj të huasë mbështetëse prej 90 miliardë eurosh. Por kjo do të prishte kalendarin fillestar të bllokut, i cili parashikon 45 miliardë euro për vitin 2026 dhe 45 miliardë të tjera për vitin 2027.

Përshpejtimi i pagesave mbart rrezikun e shterimit të ndihmës vitin e ardhshëm dhe të përkeqësimit të problemit.

Komisioni ende nuk ka marrë një kërkesë zyrtare nga Kievi për ta bërë këtë. “Fillimisht, duhet të përcaktojmë saktësisht se cilat janë këto nevoja shtesë për financim dhe më pas të diskutojmë me autoritetet ukrainase se si do t’i financojmë ato,” tha Dombrovskis, duke vënë në dukje se kredia prej 90 miliardë eurosh lejon “disa rregullime”.

Mungesa e papritur e fondeve ka ngritur pikëpyetje lidhur me llogaridhënien dhe transparencën, çështje që e kanë shoqëruar Ukrainën që nga fillimi i pushtimit rus në shkallë të plotë

Vendi është përballur me skandale të shumta korrupsioni, si dhe me raportime për mashtrime, shpërdorime dhe keqpërdorim të fondeve.