“Buka Buskers Fest”, veprimtaria e arbëreshëve që ndërthur traditën e bukës me artin bashkëkohor

Më 1 dhe 2 gusht, në lagjen historike Rrokat të Piana degli Albanesi, një nga qendrat më të rëndësishme arbëreshe të Sicilisë, u zhvillua edicioni i “Buka Buskers Fest”, veprimtaria që ndërthur traditën e bukës me artin, muzikën dhe krijimtarinë bashkëkohore.

E konceptuar si “festa e bukës dhe e arteve të rrugës”, kjo veprimtari sjell në vëmendje një nga simbolet më të rëndësishme të identitetit arbëresh, bukën tradicionale “Buka e Horës”, e lidhur ngushtë me historinë e vendosjes së arbëreshëve në Sicili dhe me kujtesën kolektive të komunitetit.

Përgjatë dy ditëve, rrugët e Piana degli Albanesi u gjallëruan nga shfaqje artistike, muzikë, teatër, cirk, poezi, punëtori krijuese dhe aktivitete për të gjitha moshat, duke krijuar një atmosferë feste mes banorëve, artistëve dhe vizitorëve.

Veprimtaria synon të forcojë lidhjen mes komunitetit, trashëgimisë kulturore dhe formave bashkëkohore të shprehjes artistike.

Sipas organizatorëve, “Buka Buskers Fest” është menduar si një festë e hapur për të gjithë, me dëshirën që komuniteti ta përqafojë çdo vit e më shumë dhe ta kthejë atë në një traditë të qëndrueshme. Festivali përcjell mesazhin se takimi, bashkëjetesa dhe pjesëmarrja në hapësira të përbashkëta kulturore janë mënyra për të rindërtuar dialogun dhe ndjenjën e përkatësisë.

Në qendër të kësaj nisme qëndron lagjja historike Rrokat, si një hapësirë që kërkon kujdes të përbashkët.

Për organizatorët, krijimi i traditave të reja që i mbledhin njerëzit së bashku është hapi i parë drejt dialogut dhe, rrjedhimisht, drejt paqes, duke e kthyer “Buka Buskers Fest” në më shumë se një festival kulturor, por në një festë të komunitetit, identitetit dhe bashkëjetesës.