Parlamenti bullgar votoi sot për heqjen e ndalimit të importit të grurit ukrainas, duke ndarë rrugët me vende si Polonia dhe Hungaria, të cilat synojnë të vazhdojnë të zbatojnë embargon për mbrojtjen e tregjeve të tyre.
“Shumica pro perëndimore në parlament e mbështeti masën, duke siguruar 124 vota pro nga 240 anëtarët, dhe tetë abstenime”, njoftoi agjencia e lajmeve BTA.
Bashkimi Evropian ka lejuar anëtarët lindorë të mbrojnë tregjet e tyre duke ndaluar importin e grurit të lirë ukrainas për një periudhë të kufizuar. Afati i këtij koncesioni përfundon të premten.
Ministri hungarez i Bujqësisë, Istvan Nagy njoftoi dje se Hungaria do të vendosë në mënyrë autonome një bllok importi për grurin, misrin, farat dhe lulediellin ukrainas, nëse BE-ja nuk e zgjat afatin e koncesionit.
Çështja ka fituar rëndësi që kur Rusia u tërhoq në korrik nga marrëveshja për të lejuar eksportin e grurit ukrainas nëpërmjet porteve të Detit të Zi.
Rusia po kërkon lehtësimin e kufizimeve në eksportet e saj bujqësore përpara se të bjerë dakord për rinovimin e marrëveshjes.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.