“Burg të përjetshëm Thaçit”/ Kurti distancohet nga komenti i deputetit Geci: Jemi të bindur për pafajësinë e krerëve…

Kryeministri i Kosovës Albin Kurti ka reaguar për deklaratën e deputetit të Lëvizjes Vetëvendosje nga partia Guxo, Fatos Gecit, që i uronte Hashim Thaçit fatin e Naim Murselit, pas dënimit të këtij të fundit me burg përjetë për vrasjen e Liridona Ademajt.

Kryeministri i Kosovës Albin Kurti ka reaguar për deklaratën e deputetit të Lëvizjes Vetëvendosje nga partia Guxo, Fatos Gecit, që i uronte Hashim Thaçit fatin e Naim Murselit, pas dënimit të këtij të fundit me burg përjetë për vrasjen e Liridona Ademajt.

Ai tha se është i bindur në pafajësinë e katër ish-krerëve që po mbahen padrejtësisht në Hagë teksa përmendi edhe gjestin e Albulena Haxhiut ndaj Gecit.

“Ju e dini qëndrimin tonë për Gjykatën Speciale e cila është një gjykatë jonormale, jo transparente. Ne jemi të bindur për drejtësinë e luftës çlirimtare të popullit të Kosovës, bartëse e së cilës ishte UÇK-ja dhe në pafajësinë e katër krerëve që po mbahen padrejtësisht në Hagë. Ju ishit dëshmitarë që kryetarja e kuvendit, Albulena Haxhiu, ia ndërpriti fjalën, ia tërhoqi vërejtjen deputetit Geci edhe për shkak të gjuhës edhe komentit që bëri”, tha Kurti.

Ai u distancua edhe më shumë nga komenti i Gecit, duke shtuar:

“Unë jam vetëm kryetar i LVV-së dhe kryeministër, nuk jam kryetar i ndonjë komisionit disiplinor. Aq më pak për dikë që i përket një partie tjetër”, tha kryeministri.

Kujtojmë se Kurti ishte i pranishëm edhe gjatë protestës në Prishtinë që u mbajt në 18-vjetorin e Pavarësisë së Kosovës, në shenjë solidariteti me ish-krerët e UÇK-së të cilët ndodheshin para Gjykatës së Hagës duke paraqitur deklaratat përmbyllëse.

“Disa nga drejtuesit e luftës sonë çlirimtare po vazhdojnë të mbahen në paraburgime të stërzgjatura në Hagë, në procese gjyqësore jo transparente dhe krejt të pashembullta për praktikat e drejtësisë ndërkombëtare. Ne besojmë në drejtësi, por nuk pranojmë ta rishkruajmë historinë. Lufta e UÇK-së ishte luftë e kulluar, çlirimtare dhe antikoloniale”, u shpreh Kurti në fjalimin e asaj dite duke nënvizuar besimin te drejtësia, por jo duke pranuar rishkruarjen e historisë së luftës.