Carney hedh poshtë akuzat amerikane për ndërhyrje në zgjedhje: s’ka ngut për marrëveshje me SHBA-në

Kryeministri kanadez Mark Carney hodhi poshtë të premten akuzat se Kanadaja planifikonte të ndërhynte në zgjedhjet e mesmandatit në SHBA dhe tha se Otava nuk nxiton për një marrëveshje tregtare me Uashingtonin.

«Këto pretendime nuk kanë asnjë bazë», u tha Carney gazetarëve gjatë një vizite zyrtare në Turqi, siç njofton Reuters. «Jam i zhgënjyer që i dërguari i tyre e sheh si rol të tijin të bëjë sugjerime të tilla», shtoi ai, duke thënë se Kanadaja nuk ka asnjë qëllim të ndërhyjë në zgjedhjet e 3 nëntorit.

Ambasada amerikane në Kanada tha të mërkurën se Otava «i shpërfill shqetësimet për ndërhyrje të mundshme në zgjedhjet amerikane, ndërsa ministrat dhe kryetarët e saj përshkruajnë hapur plane për të ndikuar në politikën amerikane». Një javë më parë, ambasadori Pete Hoekstra kishte thënë në një podcast se mesazhi i tij për kanadezët ishte «mbajeni hundën larg politikës amerikane».

I pyetur nëse Trump mund ta përdorë një rezultat të dobët zgjedhor si pretekst për tarifa të tjera ndaj Kanadasë, Carney tha se nuk e sheh të mundshme.

Sa i përket tregtisë, Carney përsëriti se Kanadaja nuk ka ngut të nënshkruajë një marrëveshje dhe, për herë të parë, la të kuptohet se Otava mund të presë edhe fundin e mandatit të Trump: «Nëse duhet të kalojnë muaj, ose edhe më shumë, ose të vijë një administratë tjetër që të kemi një marrëveshje të mirë, do ta bëjmë», tha ai. Vizita në Turqi është pjesë e një fushate për të ulur varësinë e madhe të Kanadasë nga ekonomia amerikane.

«Është plotësisht e qartë se ku qëndroj unë, ku qëndron Kanadaja dhe ku qëndrojnë kanadezët. Nuk do të bëhemi kurrë shteti i 51-të. Ne po ndjekim rrugën tonë», tha Carney.