Casano jep “pretencën”: Allegri do të shkojë në shtëpi, bashkë me Igli Taren që e zgjodhi

Antonio Cassano ka sulmuar ashpër Massimiliano Allegrin, duke deklaruar se do të largohet nga Milani në fund të sezonit, pavarësisht rezultateve. Sipas tij, trajneri kuqezi po përdor mediat për të krijuar idenë sikur largimi do të jetë zgjedhje personale:

“Ai ka nisur të lëvizë njerëzit e tij duke filtruar disa gjëra. Ka kuptuar se, qoftë i treti apo i katërti, do të shkarkohet. Prandaj po përhap idenë se po largohet vetë dhe se ka bërë mrekulli. Jo, njerëzit duhet të dinë të vërtetën: Allegri do të shkarkohet”.

Ish-sulmuesi italian shtoi se bashkë me Allegrin do të largohet edhe Igli Tare, të cilin e konsideron përgjegjës për zgjedhjen e trajnerit: “Nuk i dha identitet skuadrës dhe nuk valorizoi asgjë. Milani nuk duhet të jetë ky”.

Cassano mohoi gjithashtu se informacionet i merr nga Zlatan Ibrahimović: “Po, flas me Ibrën, por për familjen, pushimet dhe gjëra të tjera”. Në fund, ai e quajti Allegrin “trajner të dobët” edhe në komunikim: “Kur e pyesin për futbollin, shmanget sepse nuk e kupton futbollin”.