Cisternë goditet nga projektil i panjohur pranë Xhubailit në Arabinë Saudite, ekuipazhi evakuohet i sigurt

Një cisternë u godit nga një projektil i panjohur 68 milje detare në verilindje të Xhubailit, në bregdetin e Gjirit të Arabisë Saudite, njoftoi të shtunën Operacionet e Tregtisë Detare të Mbretërisë së Bashkuar (UKMTO), sipas raportimit të Reuters. Sulmi, sipas UKMTO-së, ndodhi të premten.

Të gjithë anëtarët e ekuipazhit janë të sigurt dhe janë evakuuar, shtoi UKMTO, duke theksuar se deri tani nuk është raportuar asnjë ndikim mjedisor nga incidenti. Identiteti i anijes dhe shkalla e dëmeve nuk u bënë të ditura në raportimin e së shtunës, ndërsa autoriteti i goditjes mbetet i panjohur.

Incidenti pranë Xhubailit, një prej porteve dhe qendrave industriale më të rëndësishme të Provincës Lindore saudite në Gjir, vjen në një periudhë kur sulmet ndaj anijeve tregtare në rajon janë shtuar ndjeshëm. Siç njofton CNN, vetëm gjatë javës së fundit janë raportuar 12 sulme ndaj anijeve brenda ose pranë Ngushticës së Hormuzit, sipas të dhënave të UKMTO-së, ndërsa dy anije mallrash u mbytën në fillim të javës pas goditjeve me projektile të panjohur.

Lufta mes Shteteve të Bashkuara dhe Iranit ka çrregulluar rrënjësisht qarkullimin e naftës përmes dy rrugëve kritike detare, Hormuzit dhe Bab al-Mandebit, duke i mbajtur çmimet globale të naftës mbi 100 dollarë për fuçi. Goditja e re pranë bregdetit saudit tregon se rreziku për lundrimin tregtar nuk kufizohet më vetëm në ngushticë, por po shtrihet edhe në ujërat e Gjirit.