Çmimet “TEA Awards 2026”, Gonxhja: Evokuan kalendarin e aktiviteteve, mikpritjen socio-kulturore dhe ngjarjet që…

“TEA Awards 2026” shënoi jo vetëm një ceremoni çmimesh, por edhe një aktivitet që promovon Shqipërinë si destinacion turistik, ku kultura, teknologjia dhe mikpritja ndërthuren në një platformë si TEA. Për herë të parë u zhvillua “TEA Awards 2026”, një event i organizuar nga Agjencia Kombëtare e Turizmit -Ministria e Turizmit Kulturës dhe Sportit, që vlerëson promotorët e Shqipërisë turistike bazuar në të dhënat e aplikacionit TEA (Tourism Events of Albania).

Një event me praninë e ministrit të Turizmit, Kulturës dhe Sportit, Blendi Gonxhja, dhe drejtoreshës së Përgjithshme të Agjencisë Kombëtare të Turizmit, Zana Çela, u ftuan personalitete të shumta nga turizmi, media, kultura, diplomacia dhe biznesi për të akorduar plot 35 çmime.

Blendi Gonxhja ministër i Turizmit, Kulturës dhe Sporti shprehet se çmimet synojnë të evidentojnë eventet dhe destinacione, që kanë gjeneruar interes dhe pjesëmarrje të lartë nga vizitorë vendas dhe të huaj. “Çmimet “TEA Awards 2026” evokuan kalendarin e aktiviteteve, mikpritjes social- kulturore dhe ngjarjeve që nxisin vizitueshmëri dhe ndjekje nga komunitetet dhe turistët, duke rritur audiencën e markës shqiptare sipas qarqeve dhe në të gjitha shqisat.

Mes emocioneve, mirënjohjes dhe suksesit, festuam ata që me punën dhe vizionin e tyre kontribuojnë çdo ditë në forcimin e Shqipërisë si një destinacion kulturor e turistik gjithnjë e më autentik e i vlerësuar ndërkombëtarisht”, shprehet ministri Gonxhja në rrjete sociale. Gjatë kësaj mbrëmje u prezantuan edhe risitë më të reja të aplikacionit TEA.