De Biasi dhe Gashi: Do të bëjmë maksimumin ndaj portugezëve

Gati 24 orë para nga ndeshja me Portugalinë, trajneri italian i Kombëtares sonë, Gianni De Biasi, si dhe sulmuesi Shkëlzen Gashi, dolën në konferencë për shtyp, ku premtuan se do të bëjnë më të mirën në atë 90 minutësh.
“Shpresoj që të japim të gjithë më të mirën tonë, për të arritur një rezultat, që do të kënaqë tifozët dhe do të na japë një shtysë për një renditje sa më të mirë në eliminatoret e Kampionatit Europian. Lodhja fizike ndaj Danimarkës nuk do të ndikojë”, u shpreh fillimisht Gashi.
Më pas para mediave foli trajneri i Shqipërisë, De Biasi, i cili renditi tri arsyet që për të e bëjnë këtë ndeshje të rëndësishme: “Së pari, sepse konfirmojmë formën tonë dhe rezultatet e deritanishme, së dyti sepse jemi në fazën vendimtare të ndeshjeve kualifikuese dhe së treti, sepse luajmë ndaj një kundërshtari të madh që është edhe kryesuesi i grupit tonë eliminator”.
Fatkeqësisht, pos ashtu siç bëri edhe në konferencën për shtyp para ndeshjes me Danimarkën, italiani konfirmoi se edhe në këtë takim do të mungojë për arsye dëmtimi mbrojtësi i krahut të djathtë, shkodrani Hysaj.
“Për formacionin, nuk mund të flas sot sepse kam edhe disa dyshime për të cilat do të vendos, nesër paradite. Ju siguroj që do të japim më të mirën, ndaj një kundërshtari të fortë dhe me mjaft talente në skuadër”, deklaroi ai.
Në fund trajneri i Shqipërisë, gjeti rastin edhe për të bërë shaka, me pyetjen në lidhje me markimin e yllit të Portugalisë Cristiano Ronaldo: “Shpresoj të vërë dorën në zemër, sepse unë e kam votuar për “Topin e Artë”. Përndryshe…do të votoj Mesin”- e mbylli ai, konferencën për shtyp. Më pas, ekipi ju nënshtrua seancës së fundit stërvitore përpara ndeshjes së nesërme.