Debatet e Senatit në Maine dhe Alaskë bëhen personale: lufta me Iranin rëndon mbi republikanët

Garët për Senatin në Maine dhe në Alaskë u kthyen të enjten mbrëma, më 15 tetor, në përballje të forta personale, ndërsa dy republikanët në detyrë u përpoqën të mbanin distancë nga lufta e presidentit Donald Trump me Iranin. Siç njofton CNN, debatet finale në këto dy shtete, ndër më të rëndësishmit për kontrollin e shumicës në Senat, u zhvilluan vetëm pak javë para zgjedhjeve të mesmandatit të 3 nëntorit.

Në Maine, përballja e katërt dhe e fundit mes senatores republikane Susan Collins dhe demokratit Troy Jackson u ndërpre vetëm pak minuta pas nisjes, kur një protestues bërtiti për efektet e qendrave të të dhënave për inteligjencën artificiale mbi klimën dhe resurset ujore. Collins tha se personi ishte pa dyshim përkrahës i kundërshtarit të saj, ndërsa Jackson iu drejtua shkurt me fjalët “mbylle gojën” dhe theksoi se nuk e njihte protestuesin.

Debati u ashpërsua më tej rreth çështjeve të korrupsionit dhe financimit të fushatave. Collins e akuzoi Jackson-in se nuk e kishte dorëzuar raportin e tij pranë Komisionit Federal të Zgjedhjeve, siç kishte premtuar në debatin e shkuar, ndërsa ai shpjegoi se përpunimi i donacioneve nga rreth 200 mijë persona kishte kërkuar më shumë kohë nga sa pritej. Jackson pranoi se fushata e tij kishte marrë fonde edhe nga miliarderë, por tha se nuk i detyrohet askujt një votë dhe se, nëse zgjidhet senator, do t’i taksojë pikërisht ata.

Sa i përket Iranit, Collins u distancua sërish nga Trump, duke thënë se Kongresi duhej të ishte konsultuar patjetër para se të merrej vendimi për luftë. Ajo shtoi megjithatë se rezoluta për kompetencat e luftës i kishte dhënë presidentit hapësirë veprimi në 60 ditët e para, ndaj kishte nisur të votonte për kufizimin e këtyre kompetencave vetëm pas kalimit të asaj periudhe.

Në Alaskë, senatori republikan Dan Sullivan vuri në pikëpyetje “karakterin” e sfidueses demokrate Mary Peltola, ish-kongresiste, duke iu referuar një artikulli të shtatorit në New York Times, ku ish-punonjës ngrinin pretendime për keqtrajtim të stafit. Peltola i hodhi poshtë ato si thashetheme, fabrikime ose ekzagjerime, tha se zgjedhjet nuk përcaktohen nga dita e saj më e keqe dhe përmendi dhimbjen pas humbjes së nënës dhe të bashkëshortit në vitin 2023. Sullivan nënvizoi se shkrimi mbështetej në intervista me nëntë ish-punonjës dhe të paktën 20 persona të tjerë.

Edhe në Alaskë, lufta me Iranin zuri vend qendror. Sullivan tha se ajo “duhet të mbarojë së shpejti”, se kostot e energjisë që rrjedhin prej saj janë shumë të larta për shtetin e tij dhe përsëriti kundërshtimin ndaj planit të Trump për blerjen e naftës dizel ruse. Nga ana e saj, Peltola fajësoi politikanët e Uashingtonit për “luftëra të përjetshme” që, sipas saj, u rrisin kostot qytetarëve.