Denoncimi ndaj gjyqtarit Roland Hysi, reagon KLGJ: Betejë ndaj çdo lloj korrupsioni të shfaqur

Këshilli i Lartë Gjyqësor, pasi u njoh me videon e shfaqur në mbrëmjen e datës 08.01.2019, në emisionin investigativ “STOP”, televizioni kombëtar KLAN, shpreh shqetësimin dhe indinjatën e thellë për ngjarjen dhe për implikimin e mundshëm të gjyqtarit apo gjyqtarëve të përmendur në këtë emision.

Këshilli Lartë Gjyqësor, duke vlerësuar sjelljet dhe veprimet e gjyqtarit në raport me ligjin, nxit shqyrtimin dhe verifikimin e plotë të gjithë kësaj ngjarje, nga strukturat përkatëse. Shkeljet e rënda të etikës dhe që diskreditojnë rëndë figurën e gjyqtarit, ishin arsye për të cilën reforma në drejtësi doli si domosdoshmëri, dhe do të jetë arsye që kjo reformë, me të gjithë institucionet e reja të sapo ngritura, të vijojë përpara betejën ndaj çdo lloj korrupsioni të shfaqur, në të gjitha nivelet, me qëllimin final sigurimin e sundimit të ligjit, pavarësinë dhe eficiencën e gjyqësorit.

Duke falënderuar emisionet televizive investigative, si dhe të gjithë qytetarët, për kontributin e tyre, në bërjen publike të rasteve korruptive, KLGJ garanton opinionin publik se do të bashkëpunojë pa asnjë rezervë me çdo institucion shtetëror, për verifikime sa më transparente dhe profesional ndaj çdo gjyqtari të dyshuar për përfshirje në veprimtari të paligjshme apo korruptive.

Sakaq, Prokuroria e Krimeve të Rënda ka nisur hetimet pas rastit skandaloz të denoncuar nga emisioni “Stop” në Tv Klan për gjyqtarin e Fierit, Roland Hysi.

Më herët, Prokuroria njoftoi se “duke u nisur nga pamjet filmike të transmetuara në datën 08.01.2019 në emisionin “Stop” të televizionit “Klan”, kryesisht, ka regjistruar proçedim penal për veprat penale “Ushtrimi i ndikimit të paligjshëm ndaj personave që ushtojnë funksione publike” dhe “Korrupsioni pasiv i gjyqtarëve, prokurorëve dhe funksionarë të tjerë të drejtësisë”.

Në bashkëpunim me Drejtorinë e Policisë së Shtetit janë duke u kryer veprimet e nevojshme hetimore, me qëllim hetimin e plotë të rrethanave të ngjarjes dhe të përgjegjësisë penale të personave të përfshirë”.

Një grua e divorcuar që kërkonte kujdestarinë e fëmijës me proces gjyqësor, u përball me kërkesën e gjyqtarit Roland Hysi që kërkonte para dhe favore seksuale nga zonja në fjalë.

Emisioni “Stop” ka denoncuar përmes kamerës së fshehtë bisedat e bëra me gjyqtarin Hysi dhe veprimet amorale të këtij të fundit. Në këtë çështje është përfshirë edhe psikologia Elona Meçani, e cila bën rolin e sekseres, dhe disa gjyqtarë të tjerë.