Devolli i beson stolin 33-vjeçarit Dorian Çuko, trajneri i tretë në 7 javë

Devolli ka zgjedhur trajnerin e tij të tretë brenda vetëm 7 javësh kampionat, siç njofton Panorama Sport. Klubi juglindor, që militon në Grupin B të Kategorisë së Dytë, i ka besuar stolin djalit të shtëpisë, Dorian Çukos.

33-vjeçari, i cili deri më tani ka mbajtur detyrën e zëvendëstrajnerit, merr tashmë përgjegjësinë për të drejtuar ekipin në ndeshjet në vijim. Zgjedhja mund të konsiderohet edhe një avantazh për të, pasi ai e njeh mirë grupin e lojtarëve, ambientin dhe situatën brenda skuadrës.

Çuko sezonin e shkuar ishte pjesë e Devollit si futbollist, por një dëmtim i rëndë e detyroi të hiqte dorë nga futbolli i luajtur dhe të bëhej pjesë e stafit. Tashmë mbetet për t’u parë se si do të jetë aventura e trajnerit të ri në këtë detyrë dhe nëse ai do të arrijë t’i japë skuadrës impulsin e nevojshëm për vazhdimësinë e sezonit.