Dhjetë fëmijë të lënduar në shkallët lëvizëse të qendrës “Galerija” në Beograd, disa me lëndime të rënda
Dhjetë fëmijë u dërguan në Qendrën Emergjente (Urgentni centar) të Qendrës Klinike Universitare të Serbisë në Beograd, pasi u lënduan në një incident në shkallët lëvizëse të qendrës tregtare “Galerija” rreth orës 14:35, siç i konfirmoi Shërbimi i Urgjencës (Hitna pomoć) agjencisë Tanjug, raporton Studio B.
Disa prej fëmijëve pësuan lëndime të rënda trupore, thyerje dhe lëndime në kokë, ndërsa shumica e të lënduarve pësuan lëndime më të lehta. Sipas Shërbimit të Urgjencës, fëmijët janë të moshës 8 dhe 9 vjeç — pesë djem dhe pesë vajza. Thirrja për ndihmë u mor në orën 14:33 dhe në vendngjarje dolën pesë ekipe të urgjencës. Shtatë fëmijë u vlerësuan fillimisht me lëndime të rënda, ndërsa tre me lëndime më të lehta.
Sipas informacioneve të para, të cilat ende nuk janë konfirmuar zyrtarisht, incidenti ndodhi kur shkallët lëvizëse u ndalën papritur dhe më pas u rinisën.
Prokurori publik i Prokurorisë Themelore të Parë në Beograd u njoftua për ngjarjen dhe doli në vendngjarje për këqyrje, njoftoi prokuroria për Tanjug-un. Sipas prokurorisë, pas përcaktimit të të gjitha rrethanave do të njoftohet për veprimet e mëtejshme. Rrethanat e sakta të incidentit po përcaktohen ende.


Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.