Dhunoi dhe kanosi bashkëshorten, arrestohet 67-vjeçari në Burrel, i gjendet armë zjarri në banesë

Një 67-vjeçar është arrestuar në flagrancë nga Policia në Burrel, pasi dyshohet se ka dhunuar dhe kanosur bashkëshorten e tij. Gjatë kontrollit në banesë, uniformat blu gjetën dhe sekuestruan një armë zjarri automatik, dy krehra dhe 55 fishekë.

Ngjarja është regjistruar pas një konflikti familjar në një banesë në qytetin e Burrelit. Pas marrjes së njoftimit, shërbimet e Komisariatit të Policisë Mat kanë shkuar menjëherë në vendngjarje, duke ndërhyrë për neutralizimin e situatës dhe parandalimin e përshkallëzimit të konfliktit.

Në përfundim të veprimeve, u arrestua shtetasi B. K., 67 vjeç, banues në Burrel. Sipas Policisë, nga verifikimet e kryera ka rezultuar se ai kishte dhunuar dhe kanosur bashkëshorten.

Gjatë kontrollit të banesës, Policia sekuestroi në cilësinë e provës materiale 1 armë zjarri automatik; 2 krehra dhe 55 fishekë.Materialet procedurale i janë referuar Prokurorisë pranë Gjykatës së Juridiksionit të Përgjithshëm Dibër, për veprime të mëtejshme.