Drejtori i lajmeve të N1 paralajmëron kallëzime ndaj Vladanka Maloviçit për regjistrimin e paautorizuar të bisedës
Branislav Shovljanski thotë se avokatët e tij do të kallëzojnë anëtaren e kryesisë së SNS-së për regjistrimin pa leje të bisedës së tyre telefonike, si dhe tabloidët që e transmetuan regjistrimin, pas refuzimit të N1-it për ta lejuar Vuçiçin të prezantojë listën zgjedhore në programin parazgjedhor.
Drejtori i lajmeve të televizionit N1, Branislav Shovljanski, ka paralajmëruar kallëzime penale kundër anëtares së kryesisë së Partisë Përparimtare Serbe (SNS), Vladanka Maloviç, për regjistrimin e paautorizuar të bisedës së tyre telefonike, siç i tha ai gazetës Danas.
Sipas raportimit të Danasit, Shovljanski ka bërë të ditur se avokatët e tij do të paraqesin kallëzime jo vetëm ndaj Maloviçit, por edhe ndaj tabloidëve që e kanë transmetuar regjistrimin e bisedës, e cila u publikua nga selia e SNS-së pa dijeninë e tij.
Përplasja nisi pasi redaksia e N1-it refuzoi që Aleksandar Vuçiç të prezantonte listën “Aleksandar Vuçiç – Serbia e Bashkuar” në termin e rënë dakord të mërkurën në orën 20:00, duke e arsyetuar vendimin me qëndrimin e deritanishëm të Vuçiçit ndaj këtij televizioni. Shovljanski i kishte thënë Maloviçit se ky ishte qëndrimi i redaksisë dhe se SNS-ja mund të dërgonte një përfaqësues tjetër, ndërsa një intervistë me Vuçiçin do të ishte e mundur pas zgjedhjeve.
Vuçiç e ka quajtur refuzimin “fashizëm të pastër”, ndërsa Maloviç i ka dërguar sot një letër të hapur N1-it dhe Shovljanskit. Episodi ka thelluar tensionet mes pushtetit dhe mediave të pavarura në Serbi në javën e fundit të fushatës për zgjedhjet parlamentare të 25 tetorit.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.