“Drenica meriton shumë, ëndrra ime është ta dërgojmë në Evropë”, zëvendëspresidenti Muleci flet për objektivat e klubit kuqezi
Zëvendëspresidenti i Drenicës, Muleci, në një intervistë për Telegrafin ka folur për borxhet e trashëguara, objektivin e mbijetesës në Superligë dhe ëndrrën afatgjatë për ta parë skuadrën nga Skenderaj në garat evropiane.
Zëvendëspresidenti i Drenicës, Muleci, ka folur në një intervistë për Telegrafin për rrugëtimin e tij me klubin nga Skenderaj, për vështirësitë financiare që gjeti kur u përfshi në drejtim, si dhe për objektivat sportive dhe afatgjata të kuqezinjve.
Muleci, i cili jeton mes Gjermanisë dhe Austrisë, ku zhvillon bizneset e tij, ka thënë se vendimi për t’u angazhuar te Drenica lindi nga lidhja e tij e veçantë me klubin dhe qytetin. Si drenicas dhe ish-futbollist i skuadrës, ai e ka ndier si obligim të jetë pranë saj në një moment të vështirë, duke e parë përfshirjen jo si një detyrë të rastësishme, por si një përgjegjësi ndaj vendit të tij.
Kur iu bashkua klubit, ai gjeti borxhe të trashëguara nga e kaluara, një barrë që e kishte rënduar funksionimin e Drenicës. Sipas tij, gjendja tashmë është përmirësuar dhe po punohet për një strukturë më të qëndrueshme, që i jep klubit një bazë më të sigurt për të ardhmen. “Më herët janë dhënë shumë premtime të mëdha, por në fund nuk është bërë asgjë konkrete. Jam i bindur se klubit i nevojitet punë dhe jo fjalë”, ka thënë Muleci.
Duke folur për rezultatet e fundit, përfshirë fitoren 4-0 ndaj Llapit, zëvendëspresidenti ka theksuar se Drenica duhet të japë maksimumin në çdo ndeshje, veçanërisht në shtëpi, ku përkrahja e tifozëve është një faktor i rëndësishëm dhe një shtytje shtesë për skuadrën.
Një kapitull i ri ka nisur edhe me trajnerin Mezani, të cilin Muleci e vlerëson si trajner me përvojë dhe njohje të mirë të futbollit kosovar. Ai ka përmendur punën e tij të mëparshme te Gjilani, duke e parë përvojën e tij si një aset për projektin e Drenicës.
Pas 13 ndeshjeve, Drenica ka 12 pikë dhe renditet e teta në Superligë. “Objektivi ynë kryesor është mbijetesa në Superligë, por dëshirojmë që Drenica të jetë një kundërshtar i fortë për çdo skuadër”, ka deklaruar Muleci.
Angazhimi i tij është afatgjatë. Së bashku me kryetarin Halim Bajraktaraj dhe Granit Kocin, ai thotë se po punohet për një klub më të qëndrueshëm dhe konkurrues, me hapa të matur dhe me synim ndërtimin e një projekti që zgjat. “Ëndrra ime është që së bashku me Drenicën të bëjmë gjëra të mëdha, sepse skuadra dhe qyteti i Skenderajt e meritojnë këtë. Dëshira ime është që një ditë, së bashku me skuadrën, të arrijmë të luajmë në garat evropiane.”



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.