Droga e sekuestruar në Itali, Policia e Shtetit: Shkëmbimi do kryhej në det

Policia e Shtetit në një deklaratë të përbashkët për shtyp me Guardia Di Finanza ka dhënë detaje për sa i përket drogës së kapur ditën e sotme në Itali.

Zëvendësdrejtori i përgjithshëm për kufirin e migracionin, Genc Merepeza tha se janë aktivizuar 8 mjete të policisë shqiptare dhe 2 mjete të Guardia Di Finanza për ndalimin e trafikimit të drogës. Gjithashtu ai shtoi se kanë marrë informacion që në datë 3 shkurt, që një mjet do të bënte shkëmbimin e drogës me një peshkarexhë italiane pikërisht në ujërat detare.

Në operacion, morën pjesë 8 mjete të Policisë Kufitare nga Vlora deri në derdhje në Bunës, Policia e Shtetit në brigjet e Adriatikut dhe të Jonit, dy mjete të Guardia di Finanza-s dhe roja bregdetare.

Merepeza deklaroi se trafikantët arritën që t’i shpëtonin forcave të policisë së tre vendeve, Shqipërisë, Malit të Zi dhe Italisë. Sasia e drogës së sekuestruar është rreth 500 kilogramë. Ai tha se po kryhen hetimet për identifikimin e autorëve.