Dronë dhe pajisje inteligjente në rrugët e Durrësit, 17 të arrestuar dhe mbi 1.800 gjoba në një javë

Policia Rrugore ka shtuar monitorimin në akset kryesore rrugore të Durrësit, duke përdorur dronë, pajisje inteligjente dhe pika kontrolli në hyrje-daljet e qytetit, me synim parandalimin e aksidenteve dhe menaxhimin e trafikut.

Sipas bilancit të publikuar nga policia, gjatë javës së fundit janë arrestuar 17 shtetas për shkelje të ndryshme të Kodit Rrugor, ndërsa janë vendosur gjithsej 1.807 masa administrative.

Policia bëri të ditur se prioritet i kontrolleve ka qenë evidentimi dhe ndëshkimi i drejtuesve të mjeteve që qarkullojnë nën efektin e alkoolit, një nga shkaqet kryesore të aksidenteve me pasoja. Po ashtu, vëmendje i është kushtuar edhe parkimeve dyshe, të cilat krijojnë bllokime dhe vështirësi në qarkullimin e automjeteve në qytet.

Vetëm për drejtim automjeti në gjendje të dehur, gjatë javës janë arrestuar 10 shtetas.

Gjatë kontrolleve janë vendosur:

1.269 gjoba për tejkalim të shpejtësisë;

442 masa për ndalim, pushim ose qëndrim të gabuar;

39 masa për parakalime të gabuara;

35 masa për mosvendosje të rripit të sigurimit;

13 masa për drejtim mjeti nën efektin e alkoolit;

9 masa për përdorim të celularit gjatë drejtimit.