Duka flet për Maran, zbulon pritshmëritë për kuqezinjtë dhe habit me përgjigjen për Sylvinhon

Presidenti i Federatës Shqiptare të Futbollit, Armand Duka, ka folur për Kombëtaren shqiptare, duke u ndalur te trajneri aktual Rolando Maran, dy ndeshjet e fundit të Ligës së Kombeve dhe mbështetja e tifozëve për kuqezinjtë, raporton Top Channel.

Duka vlerësoi eksperiencën e trajnerit italian, duke theksuar se ai di ta menaxhojë presionin dhe të marrë vendimet e duhura në funksion të kundërshtarit dhe të lojtarëve që ka në dispozicion. Sipas kreut të FSHF-së, trajneri është ai që ka më shumë dhimbje koke gjatë ndeshjes, sepse mendon për lojën, për lojtarët që do të hedhë në fushë dhe për mënyrën se si do t’i përshtatet kundërshtarit, por eksperienca e ndihmon Maran të mos ua transmetojë presionin lojtarëve.

Presidenti i FSHF-së u ndal edhe te mbështetja e tifozëve, që kanë shteruar të gjitha biletat për sfidën e radhës në Arenën Kombëtare. Ai solli në vëmendje interesimin e madh në ndeshjen ndaj San Marinos, ku në stadium ishin të pranishëm rreth 17 mijë tifozë, diçka që, sipas tij, nuk kishte ndodhur asnjëherë më parë dhe lidhet vetëm me dëshirën e njerëzve për ta ndjekur skuadrën në stadium.

Në fund, Duka u përball edhe me dilemën Sylvinho apo Maran. Ai nuk preferoi të bënte dallime mes dy trajnerëve që kanë drejtuar Shqipërinë dhe iu përmbajt qëndrimit të tij të mëparshëm: më i miri është ai që është trajner i Kombëtares për momentin.

Ndërkohë, Duka preku edhe një çështje të rëndësishme për të ardhmen e futbollit shqiptar, Ligjin e Sponsorizimeve. Ai zbuloi se ka marrë premtime nga kryeministri dhe ministri përgjegjës për sportin se ligji mund të konkretizohet brenda këtij viti, ndonëse pas shumë diskutimeve dhe premtimeve ndër vite mbetet ende i rezervuar për një konfirmim përfundimtar.