Edhe këtë sezon Champions League ka “hirushen” e saj, Sabah Baku bën surprizën me përmbysje në shtesë dhe kualifikohe

Kompeticioni i Champions League nuk resht së surprizuari. Vjet ishte skuadra norvegjeze e Bodo Glimt, këtë sezon është… Sabah Baku!

Klubi azerbajxhanas ka siguruar një vend historik në fazën kryesore të Champions League, duke përmbysur në mënyrë dramatike Hapoel Beer-Sheva në ndeshjen e kthimit të play-off-it.

Sabah Baku, i themeluar vetëm nëntë vite më parë, ishte vetëm pak sekonda larg eliminimit, por një gol në minutat shtesë ndryshoi gjithçka.

Kur Hapoel Beer-Sheva po mendonte për kualifikimin, Tellur Mutallimov, i aktivizuar si zëvendësues, shënoi në minutën e fundit të kohës shtesë, duke e dërguar ndeshjen në shtesë.

Sabah më pas kompletoi përmbysjen. Sulmuesi nga Gaboni, Orphe Mbina, realizoi me kokë në minutën e 101-të, ndërsa Joy-Lance Mickels shënoi golin e tretë në shtesë në minutën e 115-të.

Në fund, Sabah fitoi 5-2 në ndeshjen e kthimit dhe 6-4 në rezultatin e përgjithshëm, duke siguruar për herë të parë në historinë e klubit një vend në fazën kryesore të Champions League.

Për skuadrën izraelite, eliminimi ishte veçanërisht i dhimbshëm. Hapoel Beer-Sheva kishte marrë avantazhin 4-2 në total në minutën e 61-të, kur mbrojtësi i kombëtares së Izraelit, Guy Mizrahi, shënoi me një goditje nga jashtë zone.

Por Sabah reagoi në mënyrë spektakolare në pjesën e mbetur të takimit.

Hapoel e mbylli ndeshjen me vetëm nëntë lojtarë, pasi Djibril Diop dhe Eliel Peretz u ndëshkuan me karton të dytë të verdhë gjatë kohës shtesë.

Kështu, Sabah bëhet një nga surprizat më të mëdha të këtij edicioni të Champions League dhe do të jetë pjesë e shortit të fazës kryesore, i cili do të hidhet të enjten në Monako.

Skuadra nga Azerbajxhani do të jetë mes 36 ekipeve që do të garojnë në fazën e re të Champions League, ku çdo klub do të përballet me tetë kundërshtarë të ndryshëm.

Sabah do të jetë gjithashtu një nga debutuesit në këtë fazë, së bashku me italianët e Como-s.