Eksportet i rikthehen sërish rritjes, të mbështetura nga karburantet dhe mineralet

Tregtia e jashtme shënoi rritje si në eksporte ashtu edhe në importe gjatë muajit mars, e ndikuar nga mineralet, lëndët djegëse dhe energjia për shkak të konfliktit në Lindjen e Mesme.

Sipas raportit mbi tregtinë e jashtme, publikuar nga Instituti i Statistikave (INSTAT), eksportet e mallrave arritën në 32,7 miliardë lekë, me rritje 4,1% krahasuar me marsin e vitit të kaluar dhe 5,6% më shumë se në shkurt 2026.

Rritja e eksporteve është mbështetur kryesisht nga grupi “minerale, lëndë djegëse dhe energji elektrike”, i cili ka dhënë kontributin më të madh pozitiv me 5 pikë përqindje.

Po ashtu, ndikim pozitiv kanë pasur edhe grupet “makineri, pajisje dhe pjesë këmbimi” dhe “materiale ndërtimi dhe metale”.

Megjithatë, sektorët tradicionalë të industrisë përpunuese po përballen me ngadalësim.

Grupi i “tekstileve dhe këpucëve” dhe ndikim negativ me 1,9 pikë përqindje, ndërsa ai i “ushqimeve, pijeve dhe duhanit” dha kontribut negativ prej 0,8 pikë përqindje.

Nga ana tjetër, importet e mallrave arritën në 80,3 miliardë lekë, me një rritje 8,8% në krahasim me një vit më parë dhe 17,9% krahasuar me shkurtin.

Rritja e importeve është nxitur kryesisht nga grupi i “makinerive, pajisjeve dhe pjesëve të këmbimit” me 3,2 pikë përqindje, “ushqimeve, pijeve dhe duhanit” me 1,6 pikë përqindje dhe “materialeve të ndërtimit dhe metaleve” me 1,4 pikë përqindje, duke sinjalizuar rritje të kërkesës për investime dhe konsum.

Deficiti tregtar për muajin mars është zgjeruar në 47,6 miliardë lekë, duke u rritur me 12,2% krahasuar me një vit më parë dhe me 28,2% krahasuar me shkurtin 2026.

Në aspektin gjeografik, tregtia me vendet e Bashkimit Evropian mbetet dominuese, duke zënë 55,2% të totalit të shkëmbimeve tregtare.

Eksportet drejt BE-së përbëjnë 69,4% të totalit, ndërsa importet nga BE arrijnë në 49,5%.

Ndër partnerët kryesorë tregtarë, rritje e ndjeshme e eksporteve është shënuar me Greqinë dhe Kosovën, ndërsa rënie me Italinë dhe Spanjën.

Në anën e importeve, rritje e fortë vjen nga Kina dhe Gjermania, ndërsa ulje është regjistruar nga Italia dhe Turqia.

/a.f/