Emiratet nisin hetimet për sulmin me dron në centralin bërthamor Barakah, e cilësojnë akt “terrorist”

Një ditë pas sulmit me dron në centralin bërthamor Barakah, autoritetet e Emiratet e Bashkuara Arabe njoftuan se kanë nisur një hetim për atë që e cilësuan si “sulm terrorist të paprovokuar”. Sipas deklaratës zyrtare, droni ka hyrë në territorin e vendit nga drejtimi i kufirit perëndimor.

Sulmi, i cili ndodhi të dielën, shkaktoi zjarr në një gjenerator elektrik brenda perimetrit të centralit bërthamor Barakah. Megjithatë, autoritetet theksuan se nuk ka pasur të lënduar dhe as ndikim në nivelet e sigurisë nga rrezatimi, duke konfirmuar se objekti nuk është dëmtuar në mënyrë kritike.

Emiratet e Bashkuara Arabe dhe disa vende të tjera të Gjirit nuk kanë akuzuar drejtpërdrejt Irani për sulmin, gjë që lë të hapura disa skenarë për origjinën e dronit. Vendet e rajonit zakonisht mbajnë sisteme të avancuara të mbikëqyrjes ajrore, veçanërisht për të identifikuar sulme të mundshme nga dronë ose raketa.

Zyrtarët e Emirateve paralajmëruan se vendi “nuk do të tolerojë asnjë kërcënim ndaj sovranitetit” dhe se rezervon të gjitha të drejtat diplomatike dhe ushtarake për t’iu përgjigjur çdo sulmi. Ministri i Industrisë dhe Teknologjisë së Avancuar, Dr. Sultan Ahmed Al Jaber, e cilësoi sulmin si një goditje ndaj një projekti paqësor që furnizon me energji vendin dhe shërben për zhvillimin e tij ekonomik.

Sulmi u dënua nga disa vende të rajonit. Ministria e Jashtme e Katarit e cilësoi atë si shkelje të ligjit ndërkombëtar dhe kërcënim për stabilitetin rajonal.

Ndërkohë, Shoqata Botërore Bërthamore deklaroi se centrali Barakah po funksionon në mënyrë të sigurt dhe i bëri thirrje të gjitha palëve që të shmangin çdo aktivitet ushtarak pranë objekteve civile bërthamore, duke theksuar detyrimet sipas ligjit ndërkombëtar dhe Konventave të Gjenevës.