Erdogan në vizitë të rëndësishme në Kroaci

Presidenti turk, Recep Tayyip Erdogan do të zhvillojë nesër një vizitë zyrtare në Kroaci, i shoqëruar nga pesë ministra dhe rreth 100 biznesmenë.

Analistët thonë se vizita ka një dimension të rëndësishëm ndërkombëtar duke qenë se në bisedimet me drejtuesit më të lartë kroatë, kushtuar krizës së migrantëve dhe luftës kundër terrorizmit, do të jenë të pranishëm edhe anëtarët e presidencës kolegjiale boshnjake.

Fundjavën e kaluar në Bosnje, pa asnjë njoftim zyrtar, mbërriti në një vizitë të papritur shefi i CIA-s, John Brennan, fakt që dëshmon rritjen e rëndësisë strategjike të Ballkanit.

Për vizitën e Erdoganit, kryeqyteti kroat do të jetë i blinduar dhe me trafik të kufizuar.

Masa të tilla ekstreme sigurie zakonisht janë marrë për praninë e një presidenti amerikan.