Estonia: Zjarri në kompaninë e mbrojtjes Milrem Robotics ishte zjarrvënie e porositur nga Rusia

Estonia njoftoi të martën se zjarri që shpërtheu më 15 gusht në selinë e kompanisë estoneze të mbrojtjes Milrem Robotics ishte një sulm me zjarrvënie i porositur nga shërbimet ruse të sigurisë, siç njofton Reuters.

Kryeministri Kristen Michal tha se konkluzioni mbështetet në informacionet e shërbimit të sigurisë së brendshme, KAPO-s. Ministri i Jashtëm Margus Tsahkna u shpreh se sulmi “me siguri” ishte akt sabotazhi “i urdhëruar nga shërbimet speciale të Federatës Ruse”, në një deklaratë për The Kyiv Independent, të cilën e shpërndau edhe në platformën X.

Zjarri shpërtheu në ndërtesën e Milrem Robotics në lagjen Lasnamäe të Talinit. Flakët u vunë shpejt nën kontroll dhe nuk pati rrezik për jetë njerëzish.

Tre të dyshuar u ndaluan në Letoni ditë më vonë dhe iu dorëzuan autoriteteve estoneze më 17 dhe 18 shtator. Estonia nuk zbuloi provat, duke përmendur konfidencialitetin e shërbimeve të sigurisë, por tha se incidenti përputhet me sabotazhet e tjera të kryera në emër të Rusisë në Evropë.

Kremlini e mohoi akuzën, duke e quajtur të pabazuar dhe duke thënë se nuk do ta marrë seriozisht. Ndërkohë, kryeministri suedez Ulf Kristersson e cilësoi rastin “jashtëzakonisht serioz” dhe tha se Suedia qëndron plotësisht pas Estonisë.

Milrem Robotics prodhon mjetet tokësore pa pilot TheMIS, të cilat i furnizon edhe Ukrainës.