Ferit Hoxha në Forumin e Diplomacisë në Antalia: Bashkëpunimi rajonal, domosdoshmëri për stabilitetin dhe integrimin evropian

Ministri i Jashtëm theksoi në Antalia se dialogu dhe bashkëpunimi rajonal mbeten thelbësorë për paqen dhe rrugën europiane të rajonit.

Ministri për Evropën dhe Punët e Jashtme, Ferit Hoxha, mori pjesë në edicionin e pestë të Forumit të Diplomacisë në Antalia, ku Shqipëria përcolli mesazhin e saj për forcimin e dialogut dhe të bashkëpunimit rajonal në një kohë sfidash ndërkombëtare.

Gjatë aktivitetit, Hoxha e cilësoi diplomacinë si instrumentin më të rëndësishëm për ndërtimin e besimit dhe avancimin e paqes. Ai zhvilloi takime dypalëshe me partnerë ndërkombëtarë dhe rikonfirmoi angazhimin e Shqipërisë për integrimin europian dhe për një të ardhme të përbashkët në rajon.

Në panelin për paqen në Ballkanin Perëndimor, ministri theksoi se bashkëpunimi rajonal nuk është vetëm zgjedhje politike, por nevojë konkrete për stabilitet, qëndrueshmëri dhe ecje të sigurt drejt Bashkimit Europian. Sipas tij, vetëm përmes dialogut strategjik dhe përgjegjësisë së përbashkët mund të përballohen pasiguritë e kohës.

Burimi: RTSH