Fest Folk 2026, nga qyteti në qytet me këngët dhe vallet e traditës

Fest Folk 2026 vijon të udhëtojë nëpër Shqipëri, duke bashkuar publikun me këngën, vallen dhe pasurinë e traditës sonë kulturore.

Pas shfaqjeve në Vlorë, Laç, Sarandë dhe Durrës, Fest Folk 2026 vijon rrugëtimin me një tjetër ndalesë të rëndësishme, këtë herë në Gjirokastër. Ansambli Kombëtar i Këngëve dhe Valleve Popullore do të ngjitet nesër (13 gusht) në skenën e Gjirokastrës, për t’i dhuruar publikut një mbrëmje të veçantë kushtuar muzikës, këngës dhe valles shqiptare.

Rrugëtimi i deritanishëm është shoqëruar me duartrokitje dhe emocione në qytetet ku Ansambli ka performuar. Në Durrës, këngët, vallet dhe tradita shqiptare krijuan një atmosferë festive, me ritëm, ngjyra dhe energji, ndërsa publiku u bë pjesë e drejtpërdrejtë e spektaklit.

Nën tingujt e muzikës qytetare dhe ritmet e folklorit shqiptar, skena u shndërrua në një festë të përbashkët, ku artistët dhe publiku u bashkuan përmes këngës dhe valles. Kjo ishte një mbrëmje ku spektatori nuk mbeti thjesht përballë skenës, por u bë pjesë e saj.

Tashmë radha i vjen Gjirokastrës, qytetit të gurtë dhe një prej qendrave më të rëndësishme të trashëgimisë kulturore shqiptare. Në këtë qytet, ku tradita është pjesë e pandarë e identitetit, artistët e Ansamblit do të sjellin ngjyrat, ritmet dhe emocionet e folklorit shqiptar.