Sulm terrorist para Ambasadës së Izraelit në Beograd, sulmuesi i mitur u vra

Një sulm terrorist është kryer sonte, 15 minuta pas mesnate, para Ambasadës së Izraelit në Beograd, ku një i mitur ka sulmuar me dy thika pjesëtarin e Xhandarmërisë që ruante objektin diplomatik në bulevardin Knez Aleksandar Karagjorgjeviç në Dedinje, siç njofton RTS-ja.

Sipas ministrit të Brendshëm në mandat teknik, Ivica Daçiç, sulmuesi, identiteti i të cilit ende nuk është përcaktuar dhe që dyshohet se është nga Shabaci, iu vërsul xhandarit duke bërtitur “Allahu ekber”. Xhandari reagoi në vetëmbrojtje dhe e vrau sulmuesin, ndërsa vetë u plagos lehtë, me një prerje në fytyrë.

Daçiç bëri të ditur se shërbimet e sigurisë e kishin ndjekur më herët sulmuesin, i cili, sipas të dhënave operative, ishte mbështetës i Shtetit Islamik dhe në profilin e tij në Instagram mbante flamurin e zi dhe simbolet e kësaj organizate terroriste.

‘Duke pasur parasysh se në territorin e vendit tonë u krye një sulm terrorist, mora vendimin ta ngre nivelin e kërcënimit nga terrorizmi në shkallën më të lartë të mundshme — shkallën e kuqe’, tha Daçiç, siç transmeton RTS-ja. Kjo nënkupton kontroll dhe prani të shtuar të forcave policore në lokacionet me rëndësi të veçantë, përfshirë objektet e infrastrukturës dhe vendet ku mblidhen shumë qytetarë.

Ministri, së bashku me drejtorin e policisë Dragan Vasiljeviç, vizitoi xhandarin e plagosur, i cili ndihet mirë dhe pritet të lëshohet sot në shtëpi, siç njofton Telegraf.rs. Hetimi për të gjitha rrethanat e sulmit është në vazhdim.