Filip Zindoviq arrestohet në Holandë, i kërkuar nga Interpoli i Podgoricës për kontrabandë kokaine

Filip Zindoviq (37 vjeç), i njohur më parë me mbiemrin Kljajeviq, shtetas i Malit të Zi, është arrestuar nga policia e Mbretërisë së Holandës, duke vepruar me kërkesë të NCB Interpol Podgorica, siç njofton Dan, duke cituar policinë malazeze.

Ai kërkohej me njoftim të kuq ndërkombëtar të Interpolit, pasi Gjykata e Lartë e Podgoricës kishte lëshuar urdhër për gjetjen dhe dorëzimin e tij Prokurorisë Speciale Shtetërore, për t’u ndjekur penalisht si i dyshuar për krijimin e një organizate kriminale dhe dy vepra penale të prodhimit, mbajtjes dhe vënies në qarkullim të paautorizuar të drogave narkotike.

Zindoviq dyshohet se, së bashku me disa persona të tjerë të pandehur, si anëtar i një organizate kriminale që vepronte në territorin e Malit të Zi dhe në disa shtete të tjera, ka marrë pjesë në kontrabandën ndërkombëtare të kokainës.

Policia holandeze ka njoftuar palën malazeze se Zindoviq do të ekstradohet në Mal të Zi pasi të ketë vuajtur dënimin me burg që i është shqiptuar në Holandë për një vepër penale të kryer në atë shtet; atij i është caktuar paraburgimi në një institucion ndëshkues në Hollandën e Veriut, në përputhje me dënimin e shqiptuar në procedurën penale atje.