BERLIN – Gjermania premton mbështetje për Ukrainën përpara dimrit

BERLIN, 29 shtator /ATSH-DPA/- Kancelari gjerman Friedrich Merz tha sot se do të bëjë gjithçka të mundur për ta ndihmuar Ukrainën të përballojë dimrin e ardhshëm, ndërsa udhëheqësit evropianë po diskutojnë për mbështetje të mëtejshme financiare dhe ushtarake për Ukrainën.

“Në prag të një takimi të Këshillit Evropian, që pritet të zhvillohet në mesin e tetorit, po zhvillohen diskutime për mënyrën se si mund të rritet ndihma për Ukrainën”, tha Merz gjatë një takimi në Berlin me presidentin e Kazakistanit, Kassym-Jomart Tokayev.

Merz tha se në diskutimet e BE-së do të shqyrtohet edhe mbështetja konkrete për buxhetin e Ukrainës, si dhe përmirësimi i mbrojtjes ajrore të vendit.

Sipas tij, mbrojtja ajrore është aktualisht një nga sfidat më të mëdha me të cilat përballet Ukraina.

Merz tha gjithashtu se po zhvillon biseda të drejtpërdrejta me disa liderë botërorë, me synimin për të siguruar pajisje dhe sisteme të nevojshme për mbrojtjen ajrore të Ukrainës.

Kancelari gjerman përsëriti kërkesën e tij që Rusia t’i japë fund luftës dhe të hyjë në negociata serioze, ku sipas tij duhet të përfshihen edhe vendet evropiane.

Presidenti kazak kërkon ndalimin e përkohshëm të luftimeve

Presidenti i Kazakistanit, Kassym-Jomart Tokayev, tha se mbështet ndalimin e përkohshëm të operacioneve ushtarake në territorin e Ukrainës, në mënyrë që të krijohen kushtet për diplomaci dhe negociata.

Tokayev nuk bëri kritika të drejtpërdrejta ndaj Rusisë apo Ukrainës, duke thënë se të dyja vendet janë miq të Kazakistanit.

Në deklaratën e tij, Tokayev vlerësoi edhe presidentin rus Vladimir Putin.

“E njoh shumë mirë. Dhe ai ka cilësitë e nevojshme për të qenë kreu i një shteti shumë të madh, me një histori shumë të ndërlikuar dhe me mënyrën e vet të të kuptuarit të objektivave strategjike që përballet ai vend”, tha Tokayev për Putinin. /